風雲色變！環球經濟敗象漸呈，連美股狂牛亦跪低。道指上周初仍好地地處於17000，估唔到嘭嘭聲禮拜三連16000點亦不保，過去五日累跌逾800點，禮拜三最恐怖，啲股民同大鱷好似初次被噴胡椒噴霧咁，倉惶掟貨逃亡。道指開市無耐就跌370點，中段最多跌460點，最得人驚係啲錢狂搶美債，10年期債息曾大跌33點子至1.86厘，交投多達9,240億美元，至少是十年最多，情況相當罕見，咪話唔得人驚。
總括而言，跌市藥引多，歐洲經濟唔掂係例牌菜，新focus係希臘，民調顯示當地反歐派勢力抬頭，總理又話要提前脫離歐盟拯救計劃，市場憂心呢隻歐豬仔又爆鑊，延禍歐洲經濟。此外，國基會等機構近期相繼唱淡全球經濟，經濟差油當然用少啲，油價近期似食咗瀉藥，紐約期油已到每桶80蚊美元邊，據聞唔少大鱷已輸到怕要平倉止蝕。
最慘情係好多對沖基金原本睇好美國經濟，預期喺儲局退市下美債將冇運行，所以老早就沽定先，點知又撞板。老美周三幾個數據唔得，市場開始擔心美帝經濟亦難獨善其身，加上德州發現第二宗境內伊波拉感染個案，仲要未搵到中招原因，大家頓成驚弓之鳥玩risk off，集體掟貨轉揸美債，10年期債息前晚跌穿2厘後，觸發大量淡倉斬倉盤，最多跌到1.86厘，情況係自2011年標普下調美國信貸評級以來首次。
油價冧 加元散晒
希臘10年期國債孳息前日已高於7厘的警戒線，昨日執筆時大升1.1厘至8.83厘，意大利、愛爾蘭和西班牙亦扯高約20點子，股市跌幅介乎2%至4%。不過，昨日有外電爆料話歐洲央行同希臘傾掂數，會降低抵押品要求協助當地銀行融資，執筆時希臘股市跌唔夠2%，但本月已經唔見咗兩成。
希臘陰霾下，美元昨日稍有起色，但全周計仍要跌。市場避險情緒高漲，日圓成最大贏家，昨日高見105.51兌1美元，本周反彈2%，較月初110關口反彈近4%。紐元、瑞士法郎及歐元均反彈約1%。歐洲主要貨幣中，英鎊獨憔悴，事關英倫銀行行長卡尼又出口術，話外圍經濟不振可能影響英國經濟，令明年初加息行情變冷。英鎊周初曾上返1.6美元，但昨日又失守，本周累跌約0.5%。
上周以油價下跌累加拿大石油收益為由，指加元仍未脫險，話口未完呢個禮拜累跌近1%，周三創五年新低，表現主流貨幣中最差。美元兌加元高見1.1386，昨日仍高見1.1362。油價昨日曾跌穿80美元關口，截稿時加元未跌穿前日低位，個人認為油價再跌空間不大，待加元跌至1.15時可博反彈。
奇 兵
本欄逢周五刊登