噚日舉行嘅香港高球公開賽，兩位星級球手占文尼斯同艾斯，喺粉嶺哥爾夫球會際遇各異；前者興致勃勃爭取3連勝，點知食物中毒而影響表現，首日只打出高標準兩桿；後者今日45歲生日，以低標準4桿嚟個好開始！（now683及684台今日10:00am起直播）
占文尼斯食錯嘢
平時鍾意搞笑嘅「雪茄佬」占文尼斯，噚日冇乜表情。原來禮拜一已到港嘅佢，食咗幾次海鮮後懷疑食物中毒，搞到呢幾晚都冇覺好瞓。
佢話：「我噚晚個肚好難受，夜晚瞓唔到，今日只打出高標準兩桿（72桿），已唔算太差，睇吓之後會唔會好啲。我係職業球手，就算肚痛都會捱落去。」
今日45歲牛一嘅前世界「1哥」艾斯，被譽為「雪茄占」爭取3連冠嘅勁敵。佢知道占文尼斯身體不適後講笑話：「唔關我事喎！但講真，我都替佢難過，佢曾經喺呢個地方攞過4次冠軍，今次竟然遇着身體唔舒服，我可以想像佢有幾難過。」
南非嘅艾斯又話，對上一次嚟香港參賽喺1996年，噚日佢同南韓梁容銀同組，吸引大批球迷由頭跟到落尾，艾斯暫以低標準桿4桿嘅66桿並列第3。
識睇，一定係睇足英台【英波Live】：
http://soccer.appledaily.com
http://bit.ly/engballlive