白鴿黨元朗區議員兼愛情散文作者鄺俊宇，噚日化身木工為區內居民修築木樓梯，但查實佢已經喺佔鐘現場瞓咗九晚，每日係特登抽時間返元朗議辦幫街坊，早排試過留守紅棉道時遇着大雨，結果要同戰友全身濕透瞓天橋底，最終病倒，為撐佔領都算搏晒命。
雖然佔鐘咁辛苦，但鄺俊宇話有意外收穫，包括搵到唔少寫作靈感，同埋訓練到自己習慣用手機寫作，佢話其實佔鐘都幾浪漫㗎，平日都見到唔少情侶嚟到金鐘佔領，「佢哋其實本來可以高床軟枕，可以行街睇戲食飯，但都選擇留守喺呢度，其實係患難見真情」。佢話年底會推出第三本散文集，唔知會唔會一邊佔鐘一邊搞簽名會？