謝霆鋒同王菲舊情復熾愛得纏綿，曾經為此爆喊數臭前夫嘅張栢芝，最近身邊火速出現有米新歡，毫不示弱。上個禮拜六（11日），栢芝被影到同麻甩新歡現身新加坡開餐，兩人手上戴住同款情侶繩，關係似乎非比尋常，栢芝還不避嫌帶兒子Lucas、Quintus同行，恍如一家四口好溫馨，但Lucas全程背住叔叔打機，似乎未過到Lucas呢關噃。
至於過往至愛靚仔嘅栢芝，無論前夫霆鋒、舊愛陳冠希、陳曉東都係靚仔一族，今次呢位新歡就麻甩味十足，不但外型似黃光亮咁粗豪，笑起嚟仲露出箍緊嘅鋼牙，據知，栢芝呢位有米新歡叫Martin，佢係新加坡東亞茶室嘅股東之一。
出入揸波子
平日揸波子出入嘅Martin雖然外表唔夠靚仔，不過為人就夠晒體貼，對栢芝三母子服侍周到，當日佢接載栢芝母子外出食泰國菜後，再做柴可夫送佢哋返屋企，之後獨自返茶室打躉，晚上又接栢芝撐枱腳，一日蜜會兩次，十分黐纏。
撰文：馮仁昭