建制派不斷投訴泛民帶佔領運動義工喺立法會大樓過夜，噚日建制派圍內流傳一張聲稱喺立法會大樓影到、垃圾桶有杜蕾絲安全套盒嘅相，傳出相片嘅自由黨航運交通界議員易志明話由清潔工喺10樓撿獲，大嘆立法會淪為賓館。
有咁好嘅素材，建制派點會放過？即時話畀喺立法會嘅記者知，葉國謙引述商界廖長江大讚用嘅人有安全意識，連酒店錢都慳番；佢自己食住上話呢件事惹人猜想，係咪有過夜嘅佔中人士喺立法會用完即棄？有記者反駁，10樓除咗泛民議員辦事處，亦有工聯會議員辦事處；阿謙只係話：呢個講法係冇錯！而辦公室同樣喺10樓嘅人民力量陳偉業懷疑，唔排除有人喺其他樓層用完拎去10樓，試圖插贓嫁禍，仲話如果憑一張咁嘅相就指摘佔領者，並唔合理。