80年代電視台是香港電影業搖籃，在搖籃茁壯成長的周星馳離巢後不忘一班舊同事，造就兼任武指的鄭家生有更多演出機會。雖然只是牡丹旁的綠葉，在《破壞之王》演奔雷手文泰萊的鄭家生，於圈中打滾30多年，他認為一般人誤解周星馳：「好多人話佢寸，叫佢都唔睬，其實唔知佢諗緊嘢，佢喺現場好自閉。」
撰文：藍文浩
周星馳電影《賭聖》、《審死官》、《濟公》、《破壞之王》都有鄭家生出現，更多當然是當年的無綫劇集。前年毅然離開服務30多年娘家轉投香港電視網絡（HKTV）的鄭家生，惡形惡相，專演壞人殺手，拍電影卻有更多機會發揮，如《破壞之王》演星爺和林國斌拳賽裁判奔雷手文泰萊，一句「當我奔雷手文泰萊流㗎」，加上爆衫騷肌最為搞笑。
加入港視大開眼界
講到與星爺合作的緣起，日前鄭家生受訪時說：「我哋喺TVB已經識（編按：89年與星爺合作電視劇《蓋世豪俠》），佢出咗去拍電影都有搵舊同事幫手，當時佢嘅電影好多都係同一班人做，好似達哥吳孟達、林雪咁。嗰時我有幫杜Sir做武指，所以《審死官》我有份做殺手，不過大家記得最多嘅，應該就係文泰萊啦。」
對近日有關星爺的批評，他說：「佢喺現場好自閉，一個人坐埋一邊自己諗嘢，半日都未拍到，好多人話佢寸，叫佢都唔睬，其實係唔知佢諗緊嘢。以前喺電視台迎面行過叫佢，佢都唔知，因為佢自己不斷諗緊嘢。」鄭家生轉投新勢力王維基旗下的港視，猶如進入大觀園，雙眼透着光芒的他說：「本來冇諗過要傾，因為TVB就好似屋企咁，但係佢任我開嘅條件都即刻應承，冇辦法抗拒。」
無綫欠衝勁似亞視
放下半生人的感情，只因新東家的熱誠：「好認真、大家都好有衝勁，完全係兩件事，係拍電影嘅感覺。相比之下，嗰幾年嘅無綫拍嘢就好似亞視咁。」可惜熱情不能當飯食，牌照失落、合約明年初完結，他希望繼續為香港的電視業效力：「我梗係希望香港電視業好，全世界都識啦！幾十年前大家初初都係睇日劇，之後輪到我哋香港，仲威水到衝入美國，我覺得當時香港係第二個荷李活。我都唔明點解整整吓香港會跌到咁，好似冇人睇嘅咁。」
對電視製作肉緊非常的他，下年2月就會約滿港視，而尚有兩年就滿60歲，前路如何計劃，鄭家生也說不準：「我又唔憂嘅，個仔都大喇，兩餐冇話搵唔到，𠵱家洗碗都有萬幾蚊啦。」他續說：「如果無綫搵我又無妨呀，都係咁做嘅啫。」
聲如洪鐘的鄭家生，訪問當天在果欄再扮演殺手，身水身汗轉眼就用光一包紙巾，他說：「唔緊要，出咗嚟就預咗同你哋玩番餐。」說是玩，但卻認真到不得了，他說：「冇嘢嘅，總知希望大家都出心出力，一定會好嘅！拍電視或者電影都好，仲係一分子嘅，大家賣力做好佢，令全世界都想睇、想欣賞我哋作品！」
【惡足30年】
將近60歲的鄭家生（原名鄭藩生）中氣十足，身形外貌頂多似50，他笑說：「以前都覺得自己睇落好惡，不過近幾年可能老咗，照鏡就覺得都唔係咁似衰人啫，扮吓其他角色都得啩。」鄭家生於79年加入影壇，初為武術指導，演出之餘兼任多部電影如《鎗火》等的動作指導。83年加入無綫，曾演出《神鵰俠侶》、《新紮師兄》、《巾幗梟雄》和《天與地》等劇，經常扮演大賊、殺手等惡人角色，不過最為人熟知應是《破壞之王》中的奔雷手文泰萊。12年離開無綫轉投香港電視網絡，首部拍攝作品為《警界線》。
