政界中人嘅手機俾唔同機關竊聽，已經係公開嘅秘密，所以中情局前僱員斯諾登（Edward Snowden）舊年留港期間，同協助佢嘅人士會面時，都要求對方將手機放喺雪櫃防偷聽。而中聯辦呢，就唔知驚被竊聽、定係驚有啲不可告人嘅對話內容被偷錄啦，一貫都會收起來賓嘅電話，等大家「暢所欲言」！
好似周二晚，中聯辦主任張曉明相約建制派喺西環大樓，表面食飯實質訓話時，亦要求呢班自己友繳機再暢談。據聞意氣風發話過佔中下「太陽照常升起」嘅小明興奮莫名，足足噴咗口水長達一粒鐘。從西環喺飯宴後於網頁貼嘅相可見，小明企喺已經埋咗席嘅議員後面，咪前儼如影子特首發表講話，而民建聯主席譚耀宗同新民黨主席葉劉淑儀，分別坐喺佢兩邊，自由黨黨魁田北俊同經民聯主席梁君彥就分別再坐喺隔一個位。由於小明口水多過浪花，據聞當日聽到大家個肚都嘰哩咕嚕，從譚耀宗同葉劉呢兩位中央紅人喺小明訓話下都目無表情，其他人亦垂頭耷耳，相信建制派呢晚嘅胃口認真麻麻。