噚日講起賭王三太陳婉珍減持俊文珠寶（8351），查實呢間公司近年都有主要股東同埋好多人事變動，啱啱就連主席都換埋人。自由黨主席周梁淑怡前年底開始做俊文主席，期間十分低調，本周三走埋，改由31歲嘅陸紀仁做主席。
呢位陸紀仁雖然只係三十出頭，但係已經持有兩間創業板上市公司，佢同時係羅馬集團（8072）主席，兩間公司嘅市值加埋都有5.7億元㗎。翻查紀錄，陸紀仁今年中先開始增持俊文，現時持有15%，就已經係大股東。
呢位哥哥仔舊年接受報章訪問時，直認自己係高登仔，噚日華華專登搵呢位高登巴打傾吓偈，期間有意冇意問佢係咪想做「創業板殼王」時，陸紀仁即時耍手擰頭，澄清話，「我只係管理緊兩間公司啫」，咁識講嘢，抵你咁後生就持有兩隻殼喇。