「如今嘅狀況我並不喜歡，𠵱家我已經冇太多時間可以繼續坐冷板，如果情況無法得到好轉嘅話，我就要諗辦法去解決。」呢段說話，係來自車路士前正選門將施治。自從年輕、當打而同樣穩健嘅泰拔高圖爾斯今季外借回收，重返車路士之後，過去幾年都係世界5大門將嘅施治，就被摩連奴放到後備席。雖然施治已經32歲，同高圖爾斯有10年差距，但仍然係門將嘅黃金期；加上以佢上季嘅表現，有能力勝任任何豪門嘅正選門將一席。可惜摩連奴着眼嘅，係車路士未來嘅黃金10年。無可否認，早日栽培高圖爾斯更進一步，對車路士嘅將來好重要，所以用另一個角度講，施治並冇輸畀高圖爾斯，佢只係輸畀時間。
當你面對逆境，甚至時不與我嘅時候，可以選擇安心立命；但當認為自己值得得到更好嘅時候，唔通因為大環境而認命咩？以施治嘅身手，佢絕對可以成為另一個雲達沙，喺英超豪門踢多10年正選，打到四十幾歲都冇問題。但願佢可以早日離開車仔，用行動去證明自己。
下周歐聯遇弱唔留力
做人同踢波一樣，我每日打開fb嘅時候，都見到好多朋友對香港現況有不滿，亦有唔少人試圖用雙手去改變現況。你係唔係應該好似施治一樣，為自己嘅將來去爭取，講一次：「如今嘅狀況我並不喜歡，𠵱家我已經冇太多時間可以繼續坐冷板，如果情況無法得到好轉嘅話，我就要諗辦法去解決。」呢？
車路士周六作客水晶宮，雖然下周歐聯對馬里博爾，但係對手實力唔強，所以呢場對水晶宮冇需要留力，加上上季曾經作客不敵水晶宮，間接令爭標希望幻滅，今場都係時候報仇。以摩連奴性格，贏波都未必太多，2:0啱啱好！
LULU
不懂踢波愛睇波