「各位，依家一節6點半新聞。本台獨家片段，見到龍和道最新清場片段。我地問吓外面嘅記者，你係咪見到6個警察啊？」
「對唔住，我無法證實佢係咪差人，雖然佢地都着住印咗警察字樣的背心，但有可能只係戲服，我地新聞主管話，一定要客觀，不能主觀判斷。」
「咁你主觀上都判斷唔到佢地係男定女啦？」
「無錯，6個蓄短髮嘅唔男唔女疑似警察，最穩陣嘅形容。」
「我地見到有另一名着住黑色衫的市民，雙手向後反鎖喎。」
「我地未能判斷佢係俾人反鎖定係自己鍾意做瑜伽將雙手反縛喺背後。我地無法判斷係嗰6個懷疑警察嘅物體押住嗰個人，還是佢地6個人被威脅之下，跟住對方走呢？
我地一向嚴謹，不能太快落判斷。畫面見到，嗰6條友將嗰個市民放咗落地下，然後就圍住咗佢。」
「係咪對佢拳打腳踢？」
「我地判斷唔到嗰6個人做緊乜嘢，只係見到佢地下肢不斷有節奏郁動，但不能一口咬定他們在踢人，有可能係佢地鞋底黐咗香口膠，所以係咁磨地下呢？」
「我地喺畫面見到個市民身體好似被踢中喎。」
「你咁就唔得客觀啦。至於個市民，畫面所見，無法得知佢有無被人踢中，因為有可能係佢主動瞓喺地下撞埋疑似警員的大髀呢？」
「咁可唔可以話佢地對市民使用咗武力呢？」
「我地係唔可以話疑似差人對市民使用咗武力，因為可能根本係無力，借位拍戲其實無真係踢落去。
所以，本台認為，這是一宗有6個人圍住一個瞓喺地下嘅人不斷郁動下體歷時4分鐘嘅案件，新聞報導完畢。」