阿仙奴1年前以破球會紀錄4,200萬鎊（約5.2億港元）由皇家馬德里收購奧斯爾，加盟之後表現神勇，風頭一時無兩。但呢位德國中場及後狀態每況愈下，到咗𠵱家仲傷埋，要到出年先可以再落場；場上唔掂之餘，私生活更加一團糟，最近被爆大眼仔背住女友曼迪偷食，對象仲要係球壇中人嘅另一半，前拜仁慕尼黑球員利爾嘅女友列京嘉。利爾綠帽戴完又戴，情路真係坎坷。
奧斯爾同歌星曼迪係公開嘅一對，成日俾人影到佢哋出雙入對。利爾由拜仁青訓出身，曾經喺一隊踢過一兩季，但之後都係撈唔掂，先後去過科隆同哈化柏林效力，到12年要遠赴西班牙發展加盟利雲特，到上季約滿之後至今都冇班落。
利爾𠵱家已經同列京嘉分咗手，前者最近接受德國《圖片報》訪問時翻舊賬，指摘奧斯爾搞搞震：「奧斯爾恃住自己出名，破壞我同列京嘉嘅關係，咁樣真係唔多妥。」
偷食曝光奧斯爾深潛
事件爆咗出嚟後，奧斯爾本人冇作出回應，佢經理人伊迪爾話：「我哋冇任何回應，再留意吓事情嘅發展，亦唔排除會採取法律行動嘅可能性。」至於列京嘉就冇否認佢同奧斯爾有路，只係話利爾係「黐線！」至於奧斯爾正印曼迪，都一樣拒絕評論，但係據講佢已經刪除晒喺佢facebook同instagram有奧斯爾嘅相。
綠帽男戴完又戴慘爆
利爾喺球壇發展唔順利，連情路都咁崎嶇。當年佢效力緊拜仁嘅時候，有另一位女友丹妮拉，後者亦曾經同舒韋恩史迪加拍過拖。09/10球季雲高爾嚟拜仁執教，利爾隨即被打入冷宮，到10年夏天離隊轉投哈化柏林。利爾講過決定離開拜仁亦涉及私人問題，據講就係丹妮拉出軌，而偷食對象又係德國國腳、已經退咗役嘅波歷克。如果一切屬實，連戴兩次綠帽嘅利爾就真係慘情咯。
識睇，一定係睇足英台【英波Live】：
http://soccer.appledaily.com
http://bit.ly/engballlive