正所謂唔怕生壞命、最怕改錯名，多得港產片改戲名文化，將湯告魯斯嘅《Edge of Tomorrow》譯做老套到爆嘅《異空戰士》，相信好多人同龍叔叔一樣，齋聽片名以為又係打外星人古仔，睇trailer又唔覺有乜視覺特技刺激感，上次套講多過做嘅《攻·元2077》仲懶唔夠呀？不過話晒係靚佬湯，唔入戲院點都要買番隻碟捧場，本身諗住攞嚟喺屋企送飯盒，打吓射吓總好過睇差佬打人同689死撐嘅新聞。點知一開波已經俾劇情吸引，雖然都係人類以弱小兵器對抗外星生物嘅古仔，不過就加入咗時空穿梭嘅設計，靚佬湯因緣際會，誤殺敵方大佬而獲得特異功能，每次遇劫斃命，都可以load番前一日，重新嚟過，聽落有點似佛教輪迴？龍叔叔認為更似打機嘅設定，game over？使乜驚呀，load番舊save再嚟過囉！喺戲中，靚佬湯每次死完重生，都學識點樣避過一劫，遇到困局或者選擇錯誤，仲會叫同僚開槍殺死自己，等佢可以reset再嚟過，戰鬥經驗值亦越積越多，最後由小兵變英雄，拯救萬民於苦難中，阿門。
回到未來引來無限幻想，有邊個唔想自己做錯決定時，可以重新嚟過吖？龍叔叔夠想沙士時買樓、一條單式扑中一億六合彩啦，若果可以reset重來，相信689都可能寧願放87個煙花，都唔會亂掟87個催淚彈。
龍叔叔係標準機迷，對戲內好多設定，都神經質咁聯想到遊戲機世界，好似女主角一頭金髮，配上一把大劍，就極有《FF7》主角Cloud嘅影子，而人類着上身嘅殘舊裝甲，就有點《FF6》魔裝兵團味道，龍叔叔睇得好過癮。靚佬湯年屆52歲，雖然依舊chok住靚樣做戲，不過戲中初段只係一個膽小兵仔，貪心怕死扭盡六壬避免上沙場殺敵，演來毫不討厭，後來成了人類英雄的大佬風範，演變過程自然唔突兀，令人睇得好舒服。
B級特技A級演繹
時空穿梭橋一向唔易玩，《異空戰士》密集式咁不停向前load，慶幸拍過《叛諜追擊》嘅導演德格里文，不單喺動作場面上處理得唔錯，儘管好多劇情細位要回心諗一諗先意會到，但總算編排順暢兼無乜犯駁位，文戲同打戲平衡得幾好。
港版藍光碟分三個版本，普通單碟（$199）、3D孖碟（$249）同3D鐵盒版（$279），縱觀近期好多大片都有港產鐵盒版，而且封面選圖同鐵盒質感，亦不比歐美版本遜色，售價亦平一大截，睇到得利喺呢方面幾有誠意。
《異空戰士》喺視覺特技上，無乜驚為天人嘅CG場面，起首一幕明顯來自《雷霆救兵》嘅搶灘戰，只見滿天飛機同漫天炮火亂轟，拍唔出搶灘嘅悲壯感，只算係荷李活B級製作。話雖如此，BD版喺聲畫表現上算交足功課，7.1聲效應用喺戰爭電影，簡直如魚得水，子彈橫飛、外星人亂竄，都聽得出明顯定位。至於3D，層次感出奇地豐富，大量高速動作場面，都唔會睇到人頭暈身㷫，近兩粒鐘嘅戲，不知不覺間就睇完，讓人有點意猶未盡，若果可以reset，龍叔叔必定會入戲院捧場。
龍叔叔
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
