殼股回氣，輪到實業股上。今年洗心革面嘅碧生源（926）就有濃烈大翻身味道，家陣股價只及2010年上市價3.12銀嘅兩成幾左右，而業務又已在連蝕三年後重新轉盈，加上搵到勁人做CEO，所以單係炒復蘇已相當和味，股價上番去基金最低成本價個幾兩皮，係好合理嘅事情。
碧生源上市以來，業績一直冇好過，直至今年上半年業績先令人眼前大亮，旗下兩大最暢銷產品碧生源常潤茶同埋碧生源減肥茶價價量齊升，令上半年錄得1,720萬人仔盈利，扭轉連蝕三年大弱勢，而且慷慨派發中期息每股1.25仙，佔盈利九成，回饋誠意實在可嘉！
碧生源盈利大反彈只屬起步，首先係管理層對下半年生意好樂觀，主因廣告開支已因知名度大大提升而大減，同時引入拓展電商銷售、收購保健產品等大計。上半年電商銷售只佔總盈利4.5%，一旦撻着引擎，爆炸力好強，所以下半年銷量肯定較上半年更佳，全年盈利有機增至7,000至8,000萬人仔，即係現價市盈率僅10倍左右。
業績公佈後，集團委任趙遠花為首席運營官，呢位人兄曾任蒙牛（2319）常溫液態奶事業本部銷售總監，其後更升為蒙牛營銷副總裁，意味碧生源進入生意大爆升時段，增長動力驚人。
古道祥
本欄逢周五刊出