人類唔係只得單一意志，除非生於極權鐵幕國家，自細已經被洗腦，對一個政黨、一個領導人，甚至領導人嗰仔所生嗰仔無限崇拜，否則對每一件事都應該存不同情感，正如香港部份球迷周二入場，既一邊支持香港足球隊，一邊反對暴政，不存在精神分裂問題；又正如曼聯球迷，既鍾愛本身球隊，但亦都恨班主格拉沙、管理層、上任領隊莫耶斯等無能，本質上並無不妥。當然曼聯球迷投入嘅金錢比香港多，租私人飛機飛越奧脫福，宣揚不信任莫耶斯等等訊息。
講起錢，又點唔可以提格拉沙，最近就有傳聞佢想賣盤，索價30億鎊圖出售紅魔鬼；格拉沙出名算死草，由收購曼聯，到轉移債務，再去美國上市，真係有一手，之前就有統計，曼聯新簽嘅球衣同胸口贊助，都係全球足球會最高，1年執近1.5億歐元，猶勝皇馬、曼城等豪門，連同英超電視轉播費、奧脫福超高門票同埋餐飲營業額，就算未能夠搶番歐聯入場券，喺未來2、3年亦未必會窮，一隻繼續會生金蛋嘅母雞，格拉沙𠵱家竟然願意割愛？
小弟經常多疑，我就唔信格拉沙咁好死，不過入面有咩陰謀，我冇份管曼聯條數，又真係唔知。有傳新加坡富商林榮福係熱門買家，不過佢話晒都有啲華裔血統，我真係唔想佢做水魚。
文：牽牛