平時揸開Bentley嘅上水鄉事委員會主席侯志強,閒時都會轉吓口味踩單車,最近仲因應北區多咗好多單車徑,索性組織香港單車協會,集結熱愛踩車同體育界人士搞搞新意思。侯志強話好多香港單車好手都係新界人,志同道合梗係要埋堆。雖然佢話組織同選舉無關,但見由佢擔任永遠榮譽會長,而北區多個鄉事會主席包括李冠洪、陳崇輝同李國鳳亦支持,幾個鄉頭手握唔少選票,難怪吸引到唔少想喺新東爭位插旗嘅政黨阿頭,包括自由黨田少、新民黨葉劉、經民聯新界王發叔以及工業界林大輝,聽日齊齊殺入沙田出席組織成立典禮,侯志強話多謝各巨頭畀面。