楊思琦由今年4月開始離開大台，至今仍未找到合適經理人，所以大小事務都要由自己一腳踢。思琦透露現在每星期有3日出外登台，留港時亦要作出充份準備，親自挑選登台戰衣，還會做纖體美容保持最佳狀態；其餘時間就全部留給至愛囡囡楊卓穎（Krystal）及家人，分配井井有條，這位獨力養家的單親媽媽真不易當。
撰文：嵐山
楊思琦決定離開工作13年的娘家，反而殺出一條財路，有傳離巢5個月速賺500萬，近日更一擲千萬購入將軍澳天晉第三期近九百呎單位。思琦笑到四萬咁口說：「仍需努力呀，開心事，係同屋企人一齊買，要再畀多啲心機做嘢。」思琦是出名慳妹，靠自己努力，早已是手持四個物業的包租婆；除了囡囡所需外，平時自己好少花費，她說：「我真係冇乜點買嘢，但囡囡嗰啲就唔慳得，佢返埋學一個月使成兩萬蚊㗎。」
自覺稱職媽咪
思琦是單親媽媽，前年誕下Krystal承受各方壓力，人生陷谷底，但至今仍沒有後悔，她說：「如果為保住事業唔要BB，我唔會囉！我知有人話我媽咪（貪錢），但我知唔係就得，唔需要理其他人，亦唔需要解釋。」思琦感激媽媽一直幫手照顧囡囡，讓她出外工作無後顧之憂，她說：「囡囡掛住婆婆多過我呀，試過我媽咪忙緊冇準時接佢，佢就不停叫『Where is婆婆？Where is婆？』喊晒咁。但我唔使做嘢，都會將全部時間畀晒佢，陪佢玩同講故事，基本上我覺得自己都係一位稱職媽咪。」
問到當單親媽媽是否很辛苦？她說：「天下父母都一樣辛苦，唔係剩得單親，呢份工唔會停，冇放工時間，所以做到幾多就幾多，用心對小朋友佢會知。」被問有沒有追求者？她笑說：「有冇得介紹？其實我又唔係好老，順其自然啦。如果真係有個咁嘅人出現我都要考慮好多因素，諗埋佢錫唔錫我家人同小朋友，係咪全心全意對自己，真係要睇清楚啲。」
場地提供：La Queen、Modern Beauty