大批無綫新聞部記者、編輯、主播破天荒聯署聲明向花蟹說不，獲全城激讚有良心；曾經喺1978年至81年喺無綫新聞部做記者嘅白鴿黨主席劉慧卿，噚日送果籃為呢班後輩打氣，「向捍衞獨立採訪的新聞部工作者致敬」。
卿姐話前日見到份聲明都嚇咗一跳，因為TVB新聞部一直俾人笑係CCTVB，估唔到記者咁勇猛。佢講起那些年喺TVB新聞部嘅日子，並冇呢啲自我審查：「我當年話要做驗眼嘅古仔，一連做七日都可以，好辛苦，中英版都做晒。」佢又憶述當年喺越南難民營報道營內惡劣環境，講咗句「呢度逼到插針都插唔入」，有政府官員致電無綫高層表達不滿，但高層頂得住，唔使好似前日嘅「拳打腳踢」咁被消失。
曾經着小背心吊帶裙「做扒」嘅卿姐話，家吓TVB報新聞手法有時仲衰過亞視，但希望市民知道新聞嘅取態，主要視乎傳媒機構管理層作風，要理解前線記者承受嘅壓力，希望大家唔好再挖苦TVB記者。