噚日有三隻新股掛牌，日日播住開奶茶廣告嗰間衍生集團（6893）係其中之一。佢哋主席彭少衍位太太彭太相當隆重其事，悉心打扮出席掛牌儀式。唔好講佢兩隻手上戴住嘅大粒鑽石戒指，淨係佢頸上條粒粒都好似珍寶珠咁大嘅「珠鏈」，襯埋佢一身黑色套裝都好搶眼。華華問過珠寶專家，佢哋話如果一條珍珠鏈，真係粒粒珍珠都咁大粒，又咁圓，價值相當不菲。之不過，問清楚彭太，佢話嗰條其實唔係珠鏈，只係佢件衫嘅裝飾嚟㗎咋。佢都係咁啱揀中呢件衫，冇話特別配襯過。彭太冇透露呢件衫幾錢，但斷估配咗咁大抽朱義盛，手工費都唔便宜啩。