雨傘革命進行得如火如荼，有隻「雨傘股」集成傘業前日向港交所（388）遞表申請上市，認真應景。不過，根據民建聯梁志祥噚日喺立法會所講，雨傘喺民國時期屬於攻擊性武器，黃飛鴻都係拎住把遮當武器對付奸人堅。照佢咁講，港交所上市科使唔使先搞清楚，呢間公司其實係咪賣緊武器呢？
梁志祥噚日話雨傘有三大用途，包括遮風擋雨、當枴杖用，同埋可以打野狗，所以攻擊性唔低，仲話呢個係「常識」，呢番說話真係令人倒抽一口涼氣。既然雨傘屬武器係常識，華華喺度呼籲港交所上市科處理集成嘅上市申請時，要認真搞清楚呢間公司係賣緊乜嘢喎。
雨傘革命下需求大增
大家都知，雨傘係今次香港雨傘革命嘅象徵，因為佔中活動嘅參與者打開把遮，用嚟擋住警察喺清場時，兜口兜面噴埋嚟嘅胡椒噴霧，一片遮海下，被大家形容為雨傘革命。家陣警察日日暗示明示話要清場，以萬計、甚至十萬計佔領人數去計算，香港對於雨傘嘅需求真係好大。
不過，根據集成傘業本周三遞交嘅初步招股文件，呢間公司有超過六成生意都係嚟自日本，大部份產品都係出口去日本，今年年初先至跟一間香港嘅私人貿易公司做生意，而呢間香港貿易公司，主要將雨傘轉口去歐美。如果呢間香港貿易公司嘅公闆識做生意，應該即刻訂多啲雨傘喺香港賣喇，大把市場呀。
李華華
mailto:[email protected]