為賀百歲大壽，足總搵嚟應屆世盃亞軍阿根廷歷史性訪港，前晚同港隊進行友賽。雖然美斯等球星只後備落場，但並無欺場下以7隻光蛋送畀港隊做禮物，但講到底，場波根本變咗美斯表演賽。呢個生日會埋單計數仲要蝕近千萬，不如學當年岩布仙尼喺「二奶台」唱Happy Birthday to me仲划算啦！
阿根廷迷反客為主
前晚場波雖然係足總百周年紀念賽，但全場唔多覺有為足總賀壽嘅佈置，入場睇波嘅球迷，大部份更加係着阿根廷波衫，支持4屆金球獎美斯、曼聯新寵迪馬利亞等球星。忠實港隊球迷Edmund笑言：「港隊歷史上第一次以港隊名義出賽嘅比賽，係1913年2月6日對上海，噚（前）晚對上海可能仲有意義，總好過變咗美斯表演賽。」
事實上，當美斯前晚61分鐘後備入場，全場掌聲雷動，好似喺主場作賽。呢位27歲球星亦冇令捧場客失望，貢獻兩入球1助攻，領軍大勝7:0。只係喺阿根廷離港之前，美斯依然一貫木無表情嘅作風，前晚11點抵達機場時，見到現場有20多個fans守候，佢只係報以微笑，喺保安圍成人鍊護送下，急腳入閘。相比之下，迪馬利亞沿途為fans簽名，態度就友善得多。
高層包底嗌「攞命」
至於場波亦叫好唔叫座，足總主席梁孔德噚日雖然話仲未正式埋數，但估計都要蝕成千萬，並由佢本人、會長霍震霆、副主席貝鈞奇同董事伍健「包底」承擔虧損，但係就依然覺得物有所值。「我同會長佔大部份，真係攞命。之但係好難得搵到阿根廷咁高級數對手，冇入場嘅球迷真係嘥晒。入場人數係爭啲，但氣氛唔錯，笑住蝕啦。」
問到入場人數少，係咪同宣傳不足同票價貴有關，梁主席回應話：「我哋已經做咗好多宣傳，只係今次係國際A級賽，阿根廷唔畀做咁多。今次成本貴，如果票價減低，雖然會多番啲人入場，但就蝕硬；反而𠵱家個票價，仲有機會唔蝕。唔知班球迷係咪怕咗交通影響而選擇唔入場。大球場因為封場出年唔辦外隊賽，今次唔睇有排都冇得睇啦。」
識睇，一定係睇足英台【英波Live】：
http://soccer.appledaily.com
http://bit.ly/engballlive