【雨傘革命】警方不再除暴安良，繼9.28向手無寸鐵上街參加佔中的巿民和學生施放催淚彈後，昨日凌晨，警方再出動到金鐘龍和道武力清場，其間有數名警員制服公民黨成員曾健超後，還在暗角向他粗暴圍毆，媒體清楚拍得整個過程，有片有真相。警方涉嫌濫用私刑行為，全港巿民公憤怒插，鏡頭前多次扮正氣阿Sir的鄧梓峰昨指摘警方行私刑不當要嚴懲，入行前做過警察的馬德鐘都認為有關警員要接受紀律處分。
巿民和學生為首的雨傘革命，上月底發起至今一直堅守和平抗爭，無奈遭到反佔中人士多次挑釁衝擊，黑勢力介入搞事，警方不但採取縱容和偏袒態度，昨日凌晨金鐘龍和道警方清場期間，更被多間傳媒拍到警員行使過度暴力，有多名警員更涉嫌把被制服的公民黨成員曾健超拖到暗角圍毆，令他全身多處受傷。就警方涉濫用私刑，無法無天，演藝界昨齊心譴責。
曾多次在電影中扮警員的鄧梓峰，近日更被拿來與4點鐘許Sir比較，他看過曾健超被襲片段後，昨在電話中說：「呢個行為係唔可以接受，當時嗰個人已被綁住同制服，唔係喺衝突中間，但帶去暗角，以當時嘅武力就真係太過份，好似少少行私刑。」對於保安局局長黎棟國指涉事警員已被調職，鄧梓峰說：「咁奇，呢個要交畀警監會特別小組去審查。」
黃紫盈：睇完片好心寒
曾做G4的馬德鐘昨接受電話訪問時說：「我支持大家作出民主訴求，如果警方真係濫用暴力，當然要作內部處分。」有指相關警員被調職，馬神說：「或者敏感期間離開崗位，內部會再調查。」
大台前新聞之花黃紫盈堅決反對暴力，她從海外回港即關心事件，並說：「我反對行私刑，我睇完條片好震撼，見到着制服嘅警員打人，好心寒，點可以咁踢一個人。」紫盈關注警方如何處理有關投訴，當知道有關警員只是調職，她腦中彈出一百個問號：「佢調咗去邊個環頭？佢本身乜嘢崗位？佢調職係乜嘢原因？佢呢個打人行為係咪上級指示？」紫盈促警方早日交代真相。RubberBand成員泥鯭不滿警方過份使用暴力：「睇片根本係用私刑，捉佢去暗角揼佢一鑊，跟住先拉返警署，明顯有問題。」
黃秋生：以後點信警察
曾任職懲教署二級懲教助理的喬寶寶直言未睇片段，但他說：「唔知嗰個人本身有冇武器、箍頸、反抗諸如此類，咁當然各行各業都有害群之馬。」文化監暴成員黃耀明昨譴責警方：「不能接受，以後叫我哋點樣去相信警方同政府呢？到底我哋有事時應唔應該報警好呢？」明哥呼籲同業踴躍支持行動。
《無間道》黃Sir黃秋生昨也在fb發聲，指控警方暴行：「警察有權執法，但警察係咪有權將市民拉至暗角毒打？然後話當事警員經已離職，完全無賴行徑，我建議佢哋下一步可以學吓凱撒，衝入立法會，將嗰啲唔順眼嘅議員毒打一頓，然後解散議會。」秋生昨再在電話補充：「遲啲好快畀人拉完揼落維港，同搞暗殺。巿民以後仲點信警察，權力超越咗法律。警方再唔係男子漢，變咗黑警，呢個新聞丟架到全世界。」
歐錦棠昨在電話訪問中聲討警方：「猖獗情況令巿民點能安心喺呢個社會生活落去，將來冇埋新聞自由，強權凌駕一切。」杜汶澤昨在fb發起unfriend反佔中友人行動：「由今日開始，所有支持反佔中的人，無論你有多少理據，都不再是我朋友。因為，我看到你如何支持暴力。」
不時扮警官的河國榮卻力撐警方說：「唔知當時情況，我覺得警察難做，夾咗喺中間成日俾人鬧，其實佢哋最辛苦，連續幾日唔夠瞓，又要保持冷靜。」
昨凌晨網上流傳了一張穿上警察制服的男人，面和手有很多血痕的爛面相，有名為「向香港警察致敬」網民說：「邊個打到警察咁！」不久便有網民糾正其出處是來自香港電視劇集宣傳，並說：「哈囉喂，喪屍出現，密切留意，HKTV劇集。」
採訪：陳杰、皓騫