每個office都有這種人。準確些說，是這種女人。她「靚」，未必好靚，但由於冇乜競爭對手的情況下，成為男同事們的眼糖、觀音、甚至女神。而女神身邊，總有一個或以上的男性，對佢大獻殷勤，認為終有一日，女神會為佢下凡，為佢晚晚洗衫同煮飯。
呢種雄性動物，從前我們會簡稱為「傻仔」。現在，他們有更富中國(或者印度)傳統味道的名字—觀音兵。
這個形神俱備的term究竟係邊個諗？財經版不探究了，今日講講這個觀音同兵的生態系統，於21世紀如何促進經濟。
於社交網絡設立專頁，已經是大小品牌的指定動作，但係齋「like」同分享做宣傳對make sale嚟講，唔算太直接。「一個月收到一粒都唔錯」嘅PANDORA同Victoria 's Secrect 呢啲女性品牌就進一步利用社交網絡促成直接銷售。好似Victoria 's Secrect 於2013年開始，於官網增設「Love List」功能。各位女神上網睇中貨品可以加入「愛的清單」。含蓄做法，係就咁分享至facebook，等兵仔們對號入坐，各自幻想女神分享Love List ，又咁啱俾自己睇到嘅用意，睇吓邊個會「識做」。
明顯啲嘅，可以喺個list度 tag埋啲兵，不過畀啲兵知道原來有其他士兵的存在始終有啲危險，一旦士兵們發現有高階過自己的兵種，更可能會「退役」，令女神麾下兵力大減。
所以有品牌好似Triumph同Tiffany網站有個功能，女神可以將心儀貨品相關資料一次過email畀多位士兵。當然，士兵們唔會知道其實唔止佢一個收到女神下達的「軍令」，幻想空間同畀錢意欲自然大好多。
雖然各大品牌無透露呢啲電子服務帶嚟的實際銷售數字，不過有傳媒報道Triumph的網上銷售，因為相關功能而大增，十個收到電郵的男性，八個會乖乖畀錢。女神收兵未必光明磊落，不過的而且確可以促進零售。
歌莉