好多人將港股近期弱勢賴佔中，其實港股升跌一向都係事後孔明居多，不如從玄學角度算一算，可能仲有些少八卦價值，華華問過兩位堪輿學專家，都話11月港股有機會升番。
堪輿家區仲德話，甲午年通常係特別多亂事嘅一年，好似60年前有甲午戰爭，今年就有「佔中」發生，尤其農曆9月係甲戌月，股市更加大上大落，由𠵱家到新曆11月7日，股市都有機會弱勢。佢預計，等到11月中政治問題就會解決，雖然收場應該係有錢財或者人口損失，但係11月底市況就會好番，而且一直好到年底。
玄學師麥玲玲一樣話，農曆9月係全年最頭痕嘅月份，政治陰霾去到新曆10月23日就有機會漸入佳境，到新曆11月7日，股市就有機會上返，比區師傅推算嘅日子再早多大半個月。咁即係話，散戶最快今個月底就要𥄫實有冇撈低機會嘞！