何韻詩和黃耀明昨繼續在金鐘的文化監暴留守，有指阿詩遭恐嚇淋鏹水，她無懼說：「未經確認消息，當係虛構先，但都唔應該有，因為佢係故意製造恐慌。」阿詩繼續敢言說：「好似藝人咁樣，好多封殺傳言，又有呢啲消息流出，呢幾日喺金鐘見到好多打工仔，同我講老細有畀壓力，令佢哋唔可以光明正大支持，喺呢啲唔知真偽嘅恐嚇之下，都會俾恐懼影響到，的確有效令好多人滅聲，所以文化監暴出現，拒絕呢啲有形同無形暴力。」
問阿詩出入會否小心點？她說：「藝人企到咁前線，某程度上係曝光咗自己出嚟，但唔可以因為收到啲乜嘢資訊而唔去做，冇可能因為咁改變自己做法。」明哥則說：「我冇受騷擾，但呢啲例子反映社會好多時係對女性恐嚇，唔應該容忍。」
採訪、攝影：盧妹