賭王三太陳婉珍自從喺今年初卸任東華三院主席一職之後，可能要全力照顧賭王，低調咗好多，佢喺投資方面好似亦想潛下水。前年佢高調入股創業板公司俊文珠寶（8351），持股量接近6%，聞說，三太最近喺市場沽貨，之後嘅持股量可能低過5%，即係話，即使以後佢再減持都唔使公佈，實行做隱形股東咁話。
表現麻麻 賬蝕一大截
三太喺2011年成立咗一間投資管理公司UNIR，請來一班專業人士幫佢投資，當中最出名就係證監會主席唐家成嘅哥哥唐家榮。呢間投資公司嘅投資範疇廣泛，就連創業板公司都會拎少少錢玩下，前年就拎1.1億元（每股0.77元）入股俊文，舊年俊文供股，三太亦有參與，以每股0.11元供咗大約4,500萬股。
可惜俊文呢幾年嘅股價表現認真麻麻，噚日收報0.109元，三太呢筆投資，賬面唔見咗一大截。
有經紀爆料，指三太最近有沽貨，主要係供股攞番嚟嗰批股份，套現幾百萬元；剩低1.5億股暫時好似唔郁，計劃長線持有，但由於呢批股份佔公司總股數4.5%左右，低過交易所要求嘅5%披露水平，三太以後就算沽晒都冇人知㗎。
其實唔好講話股票投資，三太今年喺物業市場都冇乜聲氣，以前不時聽到佢大手掃物業，一度持有凱旋門33伙，同埋君臨天下6伙，大部份獲利沽出；今年佢主要將旗下安利集團持有嘅跑馬地雲地利道項目招租；似係持盈保泰。
李華華
mailto:[email protected]