練馬師容天鵬呢排都算黑仔，廐內最高分馬、潛力驚人嘅「朋友仔」，上季四戰兩冠兩位，諗住今季一定扶搖直上，點知今季一出跑直路賽，起步就勒避失先機，追唔切只得第四；熱身後上仗再戰，希望可以收復前失啦，殊不知更大敗跑尾二，原來隻馬喘鳴症發作，真係冇陰功咯！
除咗「朋友仔」，廐侶楊千嬅奶奶黃淑貞隻「野孩子」，同樣行衰運，本來今季一出即勝有個好開始，當日黃淑貞亦好happy咁拉頭馬，但本月12號爭連捷之前，突然宣佈退出，右後腳不良於行，搞到大家好擔心，因為「野孩子」其實早有過唔妥，去年九月左前腿曾持續不良於行，好多時一啲傷患馬，一旦有問題搞三五七個月，都唔一定好得番，但「野孩子」真係好好彩，退出後翌日已經恢復操練，跟住日日都有出嚟快踱，相信只係小毛病，唔影響狀態進度，估計唔使好耐，大家又可以喺陣上見到佢嘅風采。