這個城市有抗命的熱血青年，也有繼續開心過活的一群，那天我到櫃員機㩒錢，身後排隊的兩個青年在高聲談話，內容是關於汽車，對白大致是這樣，A男說：「有架07年大牛（林寶堅尼），賣110萬！」B男立刻回覆：「供兩皮左右，不過難養呢！」A男：「但係一定有女上車喎！」B男：「我驚佢未上車，我都爆咗廠，幾皮嘢淨係養佢喎！」A男：「唔係……你要睇準先買！」B男發聲大笑，似明白A男意思，然後續說：「咁要睇準想媾邊條女，然後先買車……」A男搶白：「你睇啱邊件，然後就去買架大牛，跟住揸去佢面前，佢一見實肯上車啦，上得車就即係上得喇！」B男：「玩半年都係十零萬……我講架車，條女就玩兩次都厭！」A男：「有架大牛，梗係不停換女上……車啦！」
二人發聲大笑！在過數的我掛住聽二男對話，不停輸入錯資料，重複又重複，個心就越來越虛，但又好想繼續聽他們對話！而事實上我亦忍唔住回頭看看二人，兩個OK打扮的正常青年，然後我又繼續過數，他們又繼續說下去，A男：「供兩萬幾，供完都冇錢入油！」B男：「咪就係！買Audi吖！啲女好鍾意上Audi㗎！」A男：「係囉！買架二手TT就有女會上車㗎喇！」B男再「係呀！係呀！」和應！
我過完了數，離開時跟兩男一笑！我覺得他們很可愛，但同時亦想起很久之前睇過某男星的訪問，那男星育有兩個女兒，記者問到他教女心得，男星的回覆是：「如果你係為個女好，你要畀最好佢食、住豪宅、坐名車、讀名校、出入高級地方、坐頭等周遊列國！等佢對啲平嘢睇唔上眼，到有朝一日佢俾男仔呃，都一定係有消費能力嘅男仔，咁俾人呃咗，但都至少有松露、魚子醬食，坐過Aston Martin，喺英國六星級Bulgari酒店失身，佢生性啲就喺Kensington High Street豪宅！作為男人，作為父親，我可以做嘅都只有係咁多！」
如果我今天是父親，我偷呃拐騙都會以男星的方法教女，因為我跟這位男生一樣，深明男人呃女的心得，更絕對明白大部份女子都是好易呃，其實有時二手TT都不用，遊程港鐵車河，已經可以奪得芳心！所以男人媾女，其實係本小利大，但老竇為個女好，最緊要係有大博大，被人呃都未必有壞！
【鄒四的夢幻之旅】
撰文：鄒凱光
集編劇、導演、演員、主持於一身的中年漢，有着男人的浪漫。
本欄逢周四刊登