佔中踏入第19日，示威者不退避，繼續爭取真普選。金融界人士唔係唔出聲，就係希望示威者以其他途徑表達意見，超人李嘉誠噚日亦開腔，叫班後生仔馬上返屋企，唔好激動，唔好俾今日嘅激情變成明日嘅遺憾喎！
超人一直反對佔中，今年3月講過「佔中係唔啱」，早兩個月又指，政改「即使有一團矛盾，也要堅堅決決向前走」，不過，上月佢跟團上北京見習總就好似專登唔提佔中。到現時佔中啟動多日，佢老人家噚日就忽然發出一頁紙聲明，目的係叫大家返屋企。
基本上，超人係想動之以情，話理解同學們嘅熱情，又話同學已經成功傳遞心情訊息，大家都聽到咁話，之不過，話鋒一轉，佢就話「追求要以智慧導航」，而且，所有人都要守法，「如法治決堤，將會是香港最大的悲哀」。
佢份聲明又提到「一國兩制一直保障香港的生活方式，政制往前走，是保障50年不變後的未來」，超人認為，呢幾十年中國改革開放嘅決心從來冇動搖，說明只要邁出第一步，空間就無限大。
老實講，超人出聲，作用有幾大，大家心照，佔中發展至今，除非狼英認真回應大家訴求，否則冇人可以收科。