自封「香港良心」嘅亞視，拖欠近千員工9月糧足足兩星期，事情未有新進展，但亞視噚日喺冇糧出嘅情況下，如常喺大埔總台為《ATV 2014亞洲先生競選》安排舞蹈綵排探班。
雖然前日有指幕後員工罷工抗議，但現場見到差唔多20個幕後員工喺度開工，咁啱噚日朝早陳志雲喺商台節目話馬時亨買咗亞視，唔通出糧有望？八方噚日向喺綵排現場嘅亞視公關及宣傳科經理黃守東求證，佢只話暫時冇聽聞、暫時未見有人罷工、暫時運作一切正常。而肥馬聽到呢個消息呢，就回覆「哈哈哈」，笑稱自己唔識娛樂事業，點會入主亞視？最終以兩個字總結：「流料！」