社會嚴重撕裂，黃藍綠絲帶大混戰，令facebook湧現unfriend潮，人民力量立法會議員陳志全都有親身經歷。佢話早前unfriend個中學同學，不滿佢竟然話「如果有日解放軍入城，示威者就係始作俑者」。慢必話，當然好傷心冇咗一個朋友，但亦都接受唔到自己嘅朋友，可以發表解放軍入城竟然應由佔領者負責嘅言論，等同以武力鎮壓異見聲音，無視當權者嘅橫蠻。
慢必仲話，9月28日施放催淚彈當日，包括劉慧卿等一眾泛民辛辛苦苦將音響搬入場，點知俾警察攔截，警方仲將五位開路議員帶返警署，擺明玩嘢，議員獲釋放去食飯，卻俾人影相狂鬧，慢必話喺親戚WhatsApp群組入面，佢表姐轉載呢張食飯相，誤導人哋話泛民喺度嘆世界，由於唔能夠接受有人侮辱有心嘅泛民，結果親戚都冇面畀，quit group唔傾偈。