立法會噚日開始新一年度會議，泛民議員要入立法會當然易如反掌，建制派當然就易惹狙擊啲！素來聲大大嘅民建聯蔣麗芸冇有怕，坐車到中信大廈出面落車，徒步行入立法會，元秋四萬咁口話估唔到啲佔領人士相當和平，仲大叫佢「元秋」同「秋姐」，完全冇鬧佢，令佢心情勁靚，唔知同佢噚日為公民黨曾健超講咗啲公道說話有冇關？
早前曾經去過佔鐘現場探學生嘅鼠王芬，噚日則經海富天橋徒步返立法會，沿途俾一位市民追問差人打人件事，鼠王芬邊行邊耍太極，點知行到政總嘅時候，政總保安竟然唔俾佢經公民廣場過去，鼠王芬惟有行番添美道入立會。新民黨葉劉淑儀亦自爆返立法會期間，俾人用粗口鬧兼話佢係「共狗」，連阿囡都被人身攻擊為「豬乸」，佢㷫爆喪鬧呢啲人冇品同人格。