三T尾關例爆，呢晚第六場三班千八米，由黎海榮策騎「大把世界」一放到底，爆出26倍冷W勇奪花旗盃，連贏搭15倍「卡通飛飛」派1,148元，成為全晚最冷Q，季軍則由落飛大熱「勁新鮮」拎到。
「大把世界」過往三捷清一色贏谷草一哩，泥地最叻都係第二，當中千八米更加未入過三甲，今場卻一次過打破盲門數據，包括首勝泥地及初次由黎海榮建功，仲要捧走埋花旗盃，嗰吓至巴閉！徐雨石連同第五場勝出大熱門「頌友」在內，整晚一熱一冷起孖兼捧盃，成為今次全泥宴主角，至於馬主全勝團體加埋第五場苗廐「大把籌碼」跑第三，全晚出兩駒一W一P大豐收。呢個團體早排先後有兩位成員何佐芝同許晉乾仙遊，如今「大把世界」爭氣贏馬，何佐芝兒子何驥捧盃獻亡父！
馬會前主席陳祖澤，亦是全勝團體成員，今季他養馬運甚佳，早前已有個人的「好事必得」贏馬。陳祖澤在港養了數十年馬首次捧盃，難怪他十分雀躍。「『大把世界』今場捧盃，我真是很開心，黎海榮發揮得非常好，爆冷勝出是個意外驚喜，賽前我們有信心跑得位置，沒有想過可以贏兩個馬位。至於『大把籌碼』入位亦很滿意，始終牠出賽次數不多，質素尚新，希望日後有進步表現。」