和平佔領行動持續逾兩星期，各區幾乎自發成為小領地，唔只有帳篷棲宿，仲有閱讀閣、關公廟，更一度有乒乓麻雀打邊爐。位於金鐘嘅佔領區發展成熟，自成一角成「夏慤邨」；其中22號帳幕佔領者，仲有熱心人寄信支持，多得郵差叔叔緊守崗位，信件直抵公民新部落。唔知係咪憑住google map提示嘅公民廣場位置，協助郵差叔叔送信純熟迅速送出？
話說佔鐘區域位於KFC對面、近海富中心嘅一個三連帳篷，噚日突然收到來信；而嗰幾個帳篷屬於公盟、民主黨等和平佔中運動義工嘅佔領者，所以有民主黨中人收到信後，即刻興奮到影相擺上facebook，留言大讚：「多謝郵差叔叔！佢哋肯定花咗額外時間先搵到㗎！收到個吓真係好感動！」
封面「感謝郵差盡力送信」
到底嗰幾個帳篷地址係乜東東？原來寄信人寫住，「金鐘夏慤道／干諾道中佔領區近海富中心No.22帳篷佔領者收」，最特別之處係寄件人仲喺信封註明「感謝郵差盡力送信！」結果郵差不負所託，緊守崗位周圍搵位，冇放棄過任何一封信。信件最後交番畀和平佔中運動，三子之一嘅朱耀明話係一位自稱新聞工作者嘅人，來信多謝佔領者堅持到底，感激各界有心人嘅鼓勵。
李八方
mailto:[email protected]