狼英呢個舉起V字手勢、四萬咁口嘅笑容，大家係咪好耐冇見呢？呢位日日龜縮、今日又取消埋答問大會嘅香港特首梁振英，繼月初出席體育界國慶酒會，舉吓酒杯影吓相，抽完水就走人後，噚日就去咗北角一間酒店，出席亞運祝捷會。去到邊都俾人叫落台嘅689，難得見到呢班唔想牽涉政治嘅獎牌選手，終於笑番兼開金口，仲用英文讚運動員喺仁川亞運嘅努力，之後做埋人肉佈景板，難得咁受歡迎，真係唔笑就有鬼！
不停被運動員「集郵」
港隊喺今屆仁川亞運攞到6金12銀24銅，噚日大部份嘅獎牌選手都有出席。狼英到場後上台發言，之後親手頒發獎狀畀部份獎牌選手，第一個出場當然係兩金得主嘅「牛下女車神」李慧詩。特首同每位獲獎者握手影相後，就落台同運動員傾兩句，全場不停被運動員要求合照，所以就好畀面咁留咗45分鐘咁大把，唔似每次答記者問題嗰陣成日話：「最後一條問題。」
除咗慧詩，划艇金牌駱坤海、欖球隊都成功向689集郵。單車隊都算人齊，連總教練沈金康都出現，講到下月初喺香港單車館舉行嘅國際盃場地單車賽，中國勁敵最終放棄嚟港，慧詩惟有話寓賽於操。至於同場仲舉行埋亞沙運授旗，賽事會喺下月14至23日，於泰國嘅布吉舉行，香港會派出82位代表出戰26個項目。
識睇，一定係睇足英台【英波Live】：
http://soccer.appledaily.com
http://bit.ly/engballlive