昨日有一眾反佔中人士瘋傳（網上或whatsapp等）一張相，張相就係一個著住警察制服嘅男人，成塊面同隻手都爛晒，好似喪屍咁，但就依然有力擺pose，一班反佔中人士嘅caption就係話「泛民」襲警，向警員淋腐蝕性液體，先至會有6個以上警員毒打示威者云云。然後又有一位網民甚至喺FB聲稱，張相係佢現場拍攝添!
不過唔夠半日，已經有網民踢爆張相係HKTV新劇劇照兼宣傳萬聖節，HKTV官方FB亦已證實呢位「被襲」嘅「警員」其實係前大台員工胡烱龍嚟嘅，因為宣傳劇集《Night Shift》而做嘅特技化妝。一班藍絲咁「單純」，真係要睇多啲《腦筋急轉彎》啦！有前HKTV員工就特登叫胡烱龍影返張一模一樣動作嘅相話:「大家唔使擔心啦~~~佢已經完全康復~~~藍絲人放心!!!!」真係抽到水塘都乾埋!
而「當時被襲警員」胡烱龍就接受本報訪問解釋返:「個造型係舊年一套劇《Night Shift》一個造型，當時驚出街會嚇人，所以坐喺架車度影，睇完呢個網上流傳，反應得三個字:『得啖笑』，所以一定要澄清，咁搞法會亂上加亂。」