艾威（徐威信）同老婆結婚12年一直風雨同路，港視攞唔到免費電視牌，搞到艾威面臨失業，但老婆一直從旁支持。最近有人見到徐太挺住巨肚，唔少朋友仲以為佢有咗8個月身孕，走去恭喜佢，點知徐太巨肚入面係生子宮纖維瘤，最近個瘤仲急速長大，失業嘅艾威真係禍不單行。
「佢甩過幾次底」
據講徐太幾年前做過一次切除子宮瘤手術，今次係再次復發，個瘤𠵱家仲有成10cm大，醫生已經向徐太作出警告；但徐太就唔想捱多刀，而艾威對太太唔肯入手術室心急如焚，多次同老婆因為咁嗌交。
噚日馮仁昭打畀艾威，關心徐太現況，佢好憂心咁話：「其實係幾年前嘅事，雖然個瘤屬良性，但醫生話有機會病變，一早就應該做手術。但佢成日希望個瘤會自己變細，信中醫點得吖！」問係咪已經勸掂老婆入醫院做手術？艾威苦笑話：「又𠱁又鬧乜都齊，已經book好晒手術室，預備18號入院，佢口頭應承咗，但之前甩過幾次底。」
撰文：馮仁昭
