警察口口聲聲光明磊落，實際係暗角先打你一鑊。警察濫用私刑，理論上可告酷刑罪，一經定罪，可判終身監禁。而家有圖有片有真相，警方到目前只係講已將有關警員調職。
請警方留意，呢單係刑事，唔係你自己用警監會自己查自己私了就叫交代咗，如果證據確鑿都唔落案嘅話，香港真係可以正式玩完。最可怕嘅係，網上唔少人仲要講風涼話，話「抵死」、「打得太細力」云云，實在唔明點解大家接受同一套教育，竟然會有人將歪理當真理。
近來個市同香港一樣，好難睇得透，穩打穩陣就炒滬港通概念。市傳滬港通將可於本月27日正式通車，券商股炒起是常識。國泰君安（1788）作為中資券商嘅分支，相信內地大客仔會奉上多大筆錢南下幫襯。集團9月時五供一折讓供股，相信係為近迎接滬港通佈局。當時供股價5.3元，最終錄4.3倍認購，證明條街對隻股有信心。當時淨籌最多20.37億元，公司冇現金壓力，散戶無後顧之憂，另一方面亦令國泰君安做孖展能力大大提高。
今年上半年受美國市場業務帶動，上半年收入8.3億元，按年升1.15倍；純利更升1.85倍至3.96億元。反映公司美股業務成增長動力。睇基本因素國泰君安絕對值得憧憬。
Fifi
http://www.facebook.com/lovefrystock
本欄逢周二、四刊出