阿里巴巴上月成功喺美國上市後，創辦人馬雲好似冇乜聲氣，但原來佢正努力湊緊另一隻金蛋──小微金服。小微金服仲未上市，但就越嚟越高調，噚日就喺北京舉行小微分享日，以「NEXT」為主題，大講未來世界嘅支付技術，除咗同蘋果公司Apple Pay相似嘅指紋識別，仲有掌紋、聲紋、筆迹、人臉同埋鍵盤，總共六項生物特徵識別技術，一次過大晒冷。
不過，現階段真係應用緊嘅，只係可以喺速賣通（Ali Express）應用嘅鍵盤識別，同埋配合支付寶、要用兩隻手指先認證到嘅指紋識別。另外嗰4款十分似科幻電影橋段嘅識別技術，暫時只係處於研究階段，連在場嘅工作人員都話唔知幾時正式推出。
見到咁多新嘅識別方法，華華關心嘅，係喺未來世界入面，大家仲有幾多個人私隱。小微金服安全產品技術部資深總監曹愷就話，用呢類生物特徵識別取代密碼係大勢所趨，佢強調，佢哋嘅安全性比起現時採用嘅密碼高好多，相信用戶要自己識得喺私隱、安全度之間取得平衡喎。