台灣有藍營綠營、泰國有黃衫軍紅衫軍，勢估唔到，香港今天為了佔中、反佔中，可分開黃絲帶藍絲帶陣營，釀成不少家庭、朋友分裂，掀起fb之unfriend潮流，連財政司司長曾俊華都留意到。
港大學生A參加佔中靜坐之後，返到屋企，見到好多親戚坐晒度預備開大餐，一家二十人好高興咁食飯，點知食食吓，大姨媽及大姨丈（退休警官）係咁意問聲：「阿A呀，你有冇佔中呀？」學生A答話有，大姨丈即刻鬧佢：「貪玩呀，搞亂社會，犯法㗎！」學生A阿媽唔抵得，要幫個女：「阿A都係跟大隊啫，年輕人有年輕人想法，唔好咁緊張。」鬼咩，氣氛已經緊張晒，各人有不同意見，大姨媽、三姑姐、表哥表姐等加入戰團，一場家庭大食會幾乎變成互批大會，最後由五姨打圓場：「一家人坐埋食飯啫，講吓今晚車路士對阿仙奴邊隊贏好過啦。」
家庭講佔中，好易演變成意氣之爭，誰也不讓誰，林鄭月娥主打宣傳之「有商有量」，係今年之最大謊言，追源禍始，唔關政改三人組事嘅，而係中國領導人慣咗一言堂，一錘定音，習近平講完三個堅定不移，其他人只能緊跟中央，中央就係話唔郁就唔郁嘅嘞，政改三人組只係芝蔴綠豆官啫，根本只能聽話，不可說話，話同學聯對話喎，都唔知傾乜鬼。
鬧交就會持續，對話只是做騷。有兩位女士素來牙尖嘴利，說話不饒人嘅，就係有意做特首，取CY之位而代之嘅葉劉淑儀同埋民主黨主席劉慧卿。佔中事件發生後，外國傳媒高度重視，不少記者特登飛來香港採訪，令外國記者會（FCC）酒吧多咗好多生意。FCC昨日舉辦一場雙劉辯論會，就係葉劉淑儀大戰劉慧卿，兩人主講"Occupy Hong Kong"，唔駛問，梗係葉劉反對，劉慧卿支持，又講到香港之政治前景。兩位硬娘子有一定吸引力，外國記者蜂擁而至，夠晒熱鬧。周融嘅「幫幫香港出聲行動」大把錢在全港報章（蘋果好似冇）賣廣告聲稱「外國及主要傳媒只會報告佔中英勇正義，市民反對聲音誰會理？」嗱，呢次係機會啦，葉劉大戰劉慧卿，所有西方傳媒都會報導㗎呢！