佔領行動逾兩星期，香港嘅龜縮特首狼振英，除咗兌現「競選承諾」放催淚彈對付市民外，平時最愛匿喺禮實府拍片發放「廢府」之言。但原來佢喺呢個大戰當前，仲有好多偉大理念要發表，八方聽聞，最近官場中人猛咁呻，狼英係咪嫌官員太得閒冇嘢做呢，咁嘅時勢下仲成日時不時call會，向官員發表佢嘅偉論，阻住人哋做正經事！
至於要𢱑爛塊面、聽阿爺話死撐狼英嘅一眾建制派，私下一樣嬲到爆。話說狼英上周五下晝突然急call建制議員上禮賓府，大家以為有咩新指示，要對嘴夾口供啦，咁咪推晒原本嘅約會趕住去，點知狼英學咗四點鐘許Sir，一味重申中央仍然好支持佢做特首，自吹自擂聽到唔少議員想早啲返去唞。可惜做得建制派，對此只能敢怒不敢言，出去又要焗住撐。