公民黨湯家驊Ronny嘅政見路線，向來同黨友唔多啱key。噚日佢接受電台訪問時，突然疑似「葉劉」上身，一邊話唔能夠太怪責決定施放催淚彈嘅警方指揮官，一邊話「開頭10、20枚催淚彈應該放，因為情況非常混亂」。Ronny嘅言論令黨友陳家洛大義滅親，喺facebook高呼「湯家驊不代表我」，話自己親身經歷公民廣場胡椒噴霧同9.28催淚彈，認為公民抗命者無悔無憾，亦無必要同情不同情警方，請廣場上嘅同學們原諒Ronny嘅自以為是。
眼見言論辣㷫黨友，Ronny急急發聲明，澄清自己只係引述「年輕律師」嘅催淚彈言論，強調有關說法「不代表自己立場」，表明不認同警方佔中初期發放大量催淚彈，又指狼英不應縱容警隊向示威者放彈。