世界球壇又多個神童，我求大俠同大家介紹，佢就係15歲嘅馬田奧迪加特（Martin Odegaard）。奧迪加特周一為挪威披甲對保加利亞，以15歲300日之齡成為歐洲國家盃史上最年輕上陣嘅球員。唔夠16歲就入國家隊，仲勁過比利同馬納當拿兩大球王，難怪各大歐洲球會都對佢虎視眈眈，更有報道話皇家馬德里願以過千萬鎊收購。
後備上陣 2:1挫保軍
馬田奧迪加特踢進攻中場，效力挪超球隊史卓加斯特，今年8月開始做大國腳，15歲253日就為挪威上陣，喺友賽對阿聯酋，成為挪威史上最年輕嘅國腳。周一佢再接再厲，喺挪威贏保加利亞2:1場歐國外後備入替，再創紀錄，成為歐國盃史上最後生嘅球員！奧迪加特呢場波踢咗27分鐘，傳咗3腳波，博到1次犯規。
挪威神童賽後話：「可以喺主場咁多球迷面前踢波，感覺好正，最緊要我哋攞到3分。當我入場時，我有啲緊張，但當你有一個咁難得嘅機會，你自然全力以赴，享受球賽。我可以破埋紀錄，簡直係型呀！我都唔識點形容呢一年發生嘅事。」教練賀根姆都滿意奧迪加特嘅表現：「我叫佢當自己喺球會咁踢就得，我覺得佢呢場比平時表現略好㖭。」
我求大俠起一起奧迪加特底，原來佢係名將之後，青出於藍，佢老竇哈辛艾力奧迪加特以前都係球員，踢咗史卓加斯特有10年，但未入過國家隊。送個好消息畀利物浦球迷，奧迪加特兩父子都係紅軍忠實擁躉，話唔定挪威神童遲啲去晏菲路。
曼聯皇馬爭住簽
其實好多大會都吼實奧迪加特，佢亦去過曼聯、拜仁慕尼黑同史特加等試腳，曼城同皇家馬德里都好想簽佢，上個月就有報道話，皇馬願意出到1,200萬鎊（約1.5億港元）買佢。
識睇，一定係睇足英台【英波Live】：
http://soccer.appledaily.com
http://bit.ly/engballlive