由積遜出任總裁，到費沙出任教練，加上安東尼續長約留隊，紐約人新一季都算係重新出發。不過，佢哋季前賽戰績就一般，周一首度喺麥迪遜廣場主場出師就以76:81不敵速龍，季前賽3戰得1勝2負，兩大主力安東尼同A史杜達米亞各打15分鐘，只得9分同4分。
KD隨時唞3個月
雖然羅馬非一日建成，積遜依然話好滿意目前嘅角色，仲語帶雙關反插前球會湖人：「當紐約人邀請我做總裁時，我就同班主杜倫講，如果我想簽入一啲明星或者球迷鍾意嘅球員，佢會唔會唔支持我。杜倫好爽快就答應：『你放手去搞啦』。」連同唔同安東尼續約，杜倫都畀晒積遜話事，結果安東尼今夏就以5年1.24億美元嘅高價合同留守「大蘋果」。
講起季前備戰，雷霆就認真多災多難，首席得分點杜蘭特因為右腳蹠骨骨折要做手術，會方話佢要唞6至8個禮拜，不過美國傳媒報道，拓荒者後衞麥高倫上季做完同樣手術，要3個月先好番，全季亦只打到38場，仲話KD養傷期會比預期長㖭。雷霆「二少」韋斯卜克就講明，唔會喺KD缺陣期間改變角色喎。
識睇，一定係睇足英台【英波Live】：
http://soccer.appledaily.com
http://bit.ly/engballlive