禾仔返嚟啦！養傷9個月嘅阿仙奴翼鋒禾確特（左）終於擺脫咗膝傷，日前出席咗球會操練，阿仙奴官網仲上載咗佢復操嘅相，仲同隊友一齊踢練習賽，面對蒙利爾、法米尼嘅攔截一樣冇有怕，睇嚟精神唔錯，佢自己亦都喺twitter同instagram度向球迷「報喜」，而雲格亦都話對愛將回歸感到好開心，尤其前線唔多夠人，得韋碧克一個踢單前鋒，教授當然希望佢回歸可舒緩下傷兵問題啦！聽聞佢下場英超對侯城都可以做後備，唔知真唔真呢？
另外，曼聯亦有好消息，同樣司職翼鋒嘅艾舒利楊格（圖），亦喺周一完成操練後，透過instagram上載一張流汗自拍相，caption仲寫住「努力永不停止」，話畀大家聽康復得唔錯，就快可以上陣，但真心一句，佢認為迪馬利亞、法卡奧同戴利白蘭特呢班雲高爾一手買返嚟嘅猛將加盟後，自己仲可以好似季初咁成日上陣咩？
識睇，一定係睇足英台【英波Live】：
http://soccer.appledaily.com
http://bit.ly/engballlive