好悶呀！人家韓燒，心肝脾肺護心肉，多姿多彩。日燒來來去去西冷肉眼小牛柳，俾人放甩幾條街。今次終於反擊！新進日本燒肉店牛禪，和牛由頭食到尾，西冷、肉眼、面珠墩、尾龍扒、牛脷芯、牛肩肉，有軟有韌有腍有脆，食和牛只得「入口即溶」你就輸啦！
位處世貿、裝修雅致、超勁烤爐、老闆是2007年亞姐冠軍張家瑩，但這些都不是重點，重點是：食材。海膽、黑豚、松葉蟹、鱈場蟹、帆立貝，不勝枚舉……至於主角和牛，則來自日本鹿兒島、佐賀、宮崎、澳洲，還有極罕近江牛！「近江牛係日本全國和牛大賽得獎常客，極少出口，油花同肉的比例好均勻，用嚟燒最好。」總廚樂師傅說。樂師傅，現年41歲，16歲就在老牌鐵板燒店松菱學師，做過有馬、水車屋等名店，十多年前轉戰內地，年前又往澳門兜了一圈，最近回來執掌牛禪。近江西冷、肉眼，早一天預訂，才拿出來室溫解凍，燒來寧舍鬆化，幾老套都要講句：入口即溶。
怕悶嗎？樂師傅也是怕悶人，使盡人脈引入刁鑽食材，鹿兒島A4尾龍扒，即和牛pat pat對上兩條肉，運動多，脂肪少，沒牛羶。厚切燒，沒西冷的韌，沒肉眼的肥，軟腍鬆軟，多吃也不膩。澳洲M9，取面珠墩薄切燒，肉薄帶脆，少許油花，越𡁻越甘香！牛脷芯也是澳洲M9，一大條脷光取中間最嫩部份，切方條，烤來外焦香、內嫩滑。還有近腩位的牛小排，吃完滿嘴油香。還有帶筋的牛肩肉，韌韌脆脆，也是一絕。
雞也不放過，從日本博多訂來華味雞，天然飼料飼養，肉嫩滑、脂肪少，日本人甚至用來做刺身。樂師傅取雞頸拆肉，肉條連着幼幼的喉管，燒香入口脆卜卜，送一瓶純米大吟釀，吃到停不了。
記者：譚偉健
攝影：林栢鈞
牛禪
銅鑼灣告士打道280號世貿中心1302室