佔中引發網民改圖，將示威人士搭棚架固守陣地，比較《世紀帝國》(Age of Empires )裡面的築城場面，更將旺角「關帝廟」喻為「世界奇觀」。
《世紀帝國》係八十後陳年回憶，係回歸的1997年推出，話咁快就玩咗17年，起過牆，放過箭，打過快攻的你，再次見到畫面在現實上演，當然要搵番隻舊Game玩下。記者昨日問過Game舖老闆，其實原來呢隻舊game，一向都有捧場客，《世紀帝國》合輯仲突然賣斷市，剩下五至六盒如數沽清，搞到昨日要即刻補貨，預計要到下星期，先再有AOE賣，想重溫就唯有等等。唔知今次，又係咪佔中帶來的影響？
不過老闆話，如果真係想玩，其實可以上網買隻較新的《世紀帝國》高清版Game Key，或者搵他們代購。半年前開始在香港有得賣的高清版AOE，將舊版高清化，但就唔使再用IP地址搵來搵去才能對戰，跟AOE第三集一樣，已經可以上伺服器玩。舊玩法，靚畫面，新網絡，難怪老闆話，新舊都仲長賣長有啦。
記者：童傑