近呢十幾二十年，質素最高嘅本港長途馬，極可能係「爪皇凌雨」，贏過九場累積獎金7,500幾萬，曾勝出多項一級賽，包括打吡、香港盃甚至07年遠征杜拜司馬經典賽，亦能為港爭光。可惜「爪皇凌雨」馬主、有舖王之稱嘅周南，幾年前已經過身。
其實周南細佬周錦泉，養馬亦有唔錯成就，佢嘅馬多數以「辣椒」或「草原」字眼命名，最成功係簡炳墀年代嘅「紅辣椒」，曾四勝級際賽，乃2001年冠軍一哩賽盟主。家陣現役嘅「草原威龍」，雖只係四班馬，但就好有潛質，今年四月初出跑1000米直路賽得第六，表現唔太差，之後提早唞暑，等今季四歲更成熟更有把握取勝，先再部署上陣。隻馬本月7號試泥地大閘，直路一有空位即竄上奪勝，明顯進步良多。今個禮拜一薛寶力操完，今日（周二）又親自踱步，操完返嚟拍拍馬頸，並遲遲唔走，原來等副練李新榮趕到，向佢匯報隻馬嘅進度，可以話有晒搏殺動靜，今戰出爭泥地1200米正合腳法，半冷贏馬真係唔奇㗎！