民建聯屯門區議員陳雲生，近年最常去嘅地方可算係北角嘅廉政公署，咪以為佢係去飲咖啡呀，查實佢對於泛民主派被抹黑嘅新聞好上心，次次都帶住班街坊，山長水遠由新西去到港島舉報泛民！
噚日，呢位建制舉報王又出動嘞，佢帶住十多個口罩女同埋街坊去到廉署，呢次矛頭係李卓人。阿人點解獲舉報王青睞？舉報王引述報章「證據」話喎，李卓人秘密接受「聯合國工會聯合會」捐款，有晒收據同銀行交收資料，聲稱「好多人」都話今次捐款同佔中有關，要求阿人交代佢到底係立法會議員定美國間諜。調查嘅嘢由廉署做，求證嘅嘢八方亦唔馬虎，翻查資料後卻發現冇組織叫「聯合國工會聯合會」，「國際工會聯合會」就有一個。睇嚟舉報王下次出擊前要做多啲資料搜集嘞！