夜，本來係寧靜，亦係準備休息嘅時候，但偏偏有好多無聊人，有覺唔瞓，收錢走去傳媒度搞事，唉！
夜，對於馬嚟講，亦應該係準備休息嘅時候，但偏偏有好多馬，越夜越精神，而且仲會走出嚟玩吓泥沙㖭。
今期沙田夜馬跑全泥地賽，正正係有好多夜鬼出籠，嗱！好似頭場「彩球」，今季玩過兩次夜泥，得一亞一季，玩得唔錯吖！今次趁住呢個機會，睇吓可唔可以玩到贏番場嘞！
仲有第七場隻「信眼光」，啱啱上個禮拜三出嚟蒲過，你睇佢玩得幾開心，越走越快，練馬師阿蔡生見佢咁高興，嗱嗱臨今次又放佢出嚟玩。
尾場「準備就緒」仲有決心，試三課大閘先出嚟玩，上季夜泥都係玩得好興奮嘅馬，今次又點少得佢嗰份呀！