今時今日，真係今日唔知聽日事。法庭禁制令出咗，警察都毋須執法，試問冇咗執法制度，仲邊度有法治？呢吓真係完美摧毀核心價值，嬲到核爆。呢個世界真係變得太快，試問聽日有乜嘢可以寫包單話唔會發生。
當大家以為美股唔會跌嘅時候，就大跌畀你睇。標普500指數就已經打破一浪高過一浪嘅走勢，開始走向一浪低過一浪，有人估美股進入熊市。歐債危機過後，美股接近三年時間內一直向上，標普500指數由歐債危機低位升至高位，升幅接近一倍。傳統智慧話畀我哋聽，升得越急、跌得越快，所以標普500指數中長線絕對有機會跌得好深。
標普500指數見頂冇耐，但係反映美國細價股表現嘅羅素2000指數，就已經創下52周新低，唔少科網股由高位跌足五、六成。羅素2000指數仲要一早做咗雙頂，見頂果吓其實3月時已經出現，揸住美國細價股，隨時已經捱足七個月價，所以而家跌市其實已經發生到中段，而非初段。
美股跌市出現，拖累到環球股市，港股亦不能倖免，係咪要即刻沽晒啲貨呢？有貨在手的話，應該冷靜地，睇清楚自己個倉。
三類股策略大不同
跌市之中，股票可分三類。第一類，跌市之中仍然大漲小回的股份，長線走勢向好，結論，唔使沽住。第二類，跌市之中，呢類股原本好地地，但近期有迹象跟住個市跌，喺市場驚嘅時間，唔好沽住，掉番轉，應該趁大家覺得市況回穩，投資者有意欲追番貨嘅時候，先將呢類股份脫手。第三類，如果你手上撞啱有隻類似銀河娛樂（027），係又跌唔係又跌，當然早走早着。
跟住呢個策略執倉之後，當然發現股票持倉少咗，咁係咁代表唔好再買貨？又唔係，之後，係趁下一次股市跌到大家驚嘅時候，再逐步買番貨，但切忌買入濠賭股呢類資金黑洞。
呢種逆向操作，起碼唔會畀自己跌入惡性循環，否則一驚就沽，一沽就升，一升就追，一追就跌，一跌就驚，無了期不停止蝕，結果分分鐘輸得多過你揸滿倉郁都唔郁。
所以話，前景矇矓，越要鎮定。就好似雨傘革命，日日都有狼來了。社交網站成日有人話邊個邊個據點好少人，就快失守，日日都有消息講到撐唔住。其實每個示威者都有一雙腳，即使警察又好、口罩人士又好，甚至整場革命暫時被人攻陷咗，學生之後一樣可以趁人多勢眾時，再諗好方法復興。
無論股市，定係革命，變數不嬲都大。晉佳呢類分析X一早不能派上用場，因為做人做事，先講意志，再講策略。無錯，意志先係最重要，做人有意志，乜都有反先機會。
晉佳
本欄逢周三刊登